Perey (11.02.2021) Veli Yıldız pesewera çêra gureto berdo verê çhımu, ora tepiya ki veto mekeme eşto hepıs. Nıka hepsê Xarpet’tero.
Weli dewune Pırdesür’ra Harşiye’rawo. Belka domonende ma zof raştê jumun bime, ama era mı vir nino, niya sotırağ çhımune mı vera vêreno ra sono; lezekero lıske wes u sermanok bi… Mıra 5 ser qızo, demeke ezke Pırdosur’de bine, o des des dı serde biyo. Almaya’de ma onca raştê jumun ameyme; onca hên sermanok, modemero melayim bi. Jê tayine tenê siyasetra dür vınetenê, ama herkeşre rınd bi. Kam çitür wazeno hen feme xo bıçarno, kamrê çhı? Naeke siyasetra dür vındenê dinera xeylê yarendarê mı bi, jê Rustem Polat’i, dinera ju ki no bi. Kam ke kırmancki qeseybıkero chırê wes amenê, yaraniyê kerdenê, çhımê xo roşt amênê chı bereqıyenê. Mecnunê Dersim bi, welatê xora, zonê xora zof haskerdenê, itiqatê xora têbeste bi, waştêne ke kokımena xo uza ravêrneno. Xeyle oxt Almanya’de gureav, na serunê peenu de, eke venge tufongu ke tenê bi kêm, buwa barut ke tenê dariye we, zof sabi, dariya we şi dewa xo. Endi jê maskote Dersim bi. Terê vırenunê Dersim kıncunê sıpüra xo piştenêtêra feteliyenê, haqvê xo phoştde, bastuna xo destte, tevzê xuyê gırşi bojide, sarede serpuşiya vırenera tamı tamına jê sarê Dêsımuzê khan bi.
Ree nêadana Çhımê Muzır’dero, ree nêadana Kemerê Duzgın’dero, ree nêadana Gola Çhatu’dero. Jêde ki şiyenê Gola Buğrê ver, uza asenê. Şiyenê vırara heykelê Sey Rızay’de goyniyenê. Gola Buğere, Koe Meydanu, Koe Hel, dewa dinera nejdiyê. Caoke niya jaruna pırbo gune bê Xızıri nêbıvo henima, zaten naza her gamede nisanê Xızır esto. “Lengere Kemerê Xızırê Pırdesuri”, “Tumê Xızıri”, her cha lınga “Osporê Ostorê Sıpi Khal Xızıri” kotara chı! Ne sewetra Weli xo jeê Khal Xıziri piştenê têra! Hêrdısa xo jê deyi amênê miyê, xo bendê dey zonenê, koti ke Cemê Haqıye bıhesnêne, voştenê şiyenê uza, bervenê, herışi kerdenê war, çhıleyi fiştenera chı, xorê düya kerdenê. oxtê Rozê Xızır’de kerd “erörist” eşt zere! Niya beno? Eke isono nêane ke “terorist”o, dêmeke endi dina biya pırê teroristu! Bêliyo ke itiqatkarê Dêsimu jê islamcu “terörist” zonenê; zof ğelet zonenê! Dindarê Dêsımu, haskarê Haqê, haskrê hard u asmenê, haskarê dar u berê, haskarê isoniyê, haskarê emeğdarunê, haskarê haştiyê, haskarê kıştiyê, haskarê puştiyê niyê! Bê aqılêna nêanene bena? Yê mordemê masum gune derhal raverdê, gunawa, zulumo, ayvo! “Teröritêna” Weli, jurero bêkıncu vurenawo! Ayvo, balê manero bin sevevkerê… İfira urekerura ison tajij mekerê, bêhaiya gırana.
Peki çhıra çiyo nêane beno? Çhıke nêwazene ke sar şero dewune xo şenkero. Na hetra dinerê Weli orneğêro rınd niyo, hewes dano sarike peyser yenê dewune xo kenê pır! Dey serra tersu dano sari ke vanê nêaderê, çhımê sımak ke peyser amaenedero, sımarê ki niya keme, bêhude hewes mekerê… Çhıke wazenê ke mılkê dewu, madenê kowu, uwa deru, weşiya waru, darê gemu dinêrê bımanê; bıkırısnê, bırıznê, wertera wodarê! Pilanero bervato, çhı xıraviyê ke esta anê mıleti sarê! Honde chan guret, çêy rıznay, dewi kerd thol, bağ baxçheyi kerd xırave, hêğay boz bêwayir verday, hona mırd nêbiyê. Çiyo nêane, caê xo ne vicanende, ne isonende esto.
Endi savrê ison beno teng, çarê ison qılaşinora!
Çhı wazenê na mıletê feqirra?
Endi beso beso beso!
Veli Yıldız derhal serbest raverdê!
